Braziliya bilan Peruning chegarasidagi Amazon o‘rmonlarida shu paytgacha tashqi dunyo bilan muloqotga kirishmagan Janubiy Afrikadagi noma’lum qabilalardan biri topilgan. Braziliya hukumatidan bildirishlaricha, shunday qabila mavjudligini isbotlash hamda ular yashaydigan yerni himoyalashda ko‘maklashish maqsadida tasvirga tushirishgan. Uchoqdan olingan suratlarda qizil rangli, yoy va nayzalarini silkitayotgan qabila a’zolari aks etgan. Braziliya bilan Peru tutashgan hududlarda hali insoniyat bilan muloqotga kirishmagan 50 dan ziyod qabilalar istiqomat qiladi, deb ko‘riladi. Butun dunyodagi bunday qabilalar soni 100 tachani tashkil etadi. Survival International deb nomlangan tashkilot jahondagi ana shunday qabilalarni muhofaza qilish maqsadida tashkil etilgan, tashkilot rahbari Stefen Korrining aytishicha, agar himoya qilinmasa, bunday qabilalar yaqin orada yo‘q bo‘lib ketish xavfi mavjud. Survival International guruhidan bildirishlaricha, tasvirga olingan qabila a’zolari soni ortib borayotganiga qaramasdan, boshqa qabilalar yog‘och uchun noqonuniy kesilayotgan o‘rmonlar hududida yashashadi. "Biz ularning shu yerda ekanligini ko‘rsatish uchun, ularning mavjudligini namoyish etish maqsadida uylari ustidan parvoz qildik", deb aytgan Braziliya hukumatidagi hindular masalalariga mas’ul Xose Karlos dos Reis Meyrelles. "Bu juda muhim, chunki ayrimlar ularning mavjudligiga shubha bilan qaraydi", deydi mulozim. Bunday qabilalar vakillarining boshqa insonlar bilan muloqotga kirishishi ular uchun halokatli bo‘lishi mumkin. Chunki ularning immuniteti oddiy odamlar immuniteti o‘rgangan xastaliklarga chidash berolmaydi. Yakkanishin qabilalar vakillari oddiy suvchechak yoki oddiy shamollashdan ham nobud bo‘lishlari mumkin.
|